XX əsrdə Qərbi Azərbaycanda başlanmış soyqırımlar türk yaşayış məskənlərinin dağıdılması və bölgə əhalisinin erməniləşdirilməsi ilə nəticələndi. Bu, eyni zamanda, mədəniyyətimizə qarşı müharibə, çoxəsrlik irsimizə edilmiş qəsd idi. Viran qalan kəndlərimizlə bərabər toponimlərimiz, şəhərlərimizin və kəndlərimizin adı rəsmi olaraq dəyişdirildi, izlərimiz də torpaqlarımızdan silindi.

Təqdim olunan layihəmiz dədə-baba yurdumuz olan Qərbi Azərbaycandakı mədəni-tarixi izlərimizin bərpasına və qorunmasına yönəlmişdir. Əsas məqsədimiz tarixi torpaqlarımızda erməni barbarlığı nəticəsində silinmiş toponimlərimizin bərpası ilə çoxəsrlik qan yaddaşının qaytarılması, gənc nəsildə bu istiqamətdə məlumatlılığın formalaşdırılması və beynəlxalq ictimaiyyətə həqiqətlərin çatdırılmasıdır.

Sayt özündə dörd istiqaməti ehtiva edir: 1988-ci ildə əzəli, əbədi, tarixi torpaqlarımız olan Qərbi Azərbaycandan qovulmuş soydaşlarımızın evləri üzərində ailə başçısının ad və soyadı, ərazidəki toponimlər, 1918-1920-ci illərdə ermənilər tərəfindən dağıdılmış, xaraba kəndlər və Ermənistan Respublikası ərazisində azərbaycanlılara məxsus yaşayış məskənlərinin dəyişdirilmiş-erməniləşdirilmiş yer adları. Məqsədimiz sayt vasitəsi ilə tarixi həqiqətləri üzə çıxartmaq, ermənilərin azərbaycanlılara qarşı etdikləri etnik-tarixi təmizləməni dünyaya çatdırmaq və onların əməllərini ifşa etməkdir.

44 günlük Vətən müharibəsində qazandığımız Zəfərdən və 23 saatlıq uğurlu anti-terror əməliyyatından sonra Qarabağımıza qovuşduğumuz kimi Qərbi Azərbaycanımıza da qovuşmağımızın bir addımlığındayıq. Təqdim etdiyimiz bu virtual xəritə dədə-baba torpaqlarımızdan didərgin düşən, deportasiyaya uğrayan və böyük faciələr yaşayan soydaşlarımız üçün onların qayıdışına işıq saça bilər.

Biz diqqətdən yayınan toponimlərimizin yerləşdirilməsi və xəritədə ola biləcək hər hansı bir çatışmamazlıqla əlaqədar Qərbi Azərbaycandan olan soydaşlarımızı əməkdaşlığa dəvət edirik.

Son olaraq bu işdə əməyi keçən, bizə kömək edən hər bir şəxsə öz təşəkkürümüzü bildiririk!